Сооронбай Жээнбеков менен Т.Саркисян Евразия өкмөттөр аралык кеңештин жыйынына даярдыктардын жүрүшүн талкуулашты

1011 кароо Өкмөт 0

Бишкек, 6-март /Кабар/. Кыргыз Республикасынын Премьер-министри Сооронбай Жээнбеков бүгүн, 6-мартта, Евразия экономикалык комиссиясынын төрагасы Тигран Саркисянды кабыл алды. Бул тууралуу Өкмөттүн аппаратынын маалыматтык камсыздоо бөлүмү билдирди.

Жолугушуу 2017-жылдын 7-мартында Бишкек шаарында өтүүчү Евразиялык өкмөттөр аралык кеңештин кезектеги жыйынынын алкагында болду.

Өкмөт башчы белгилегендей, бул жыйын ЕАЭБ колдоо үчүн катышуучу мүчө мамлекеттер ортосунда түздөн-түз пикир алышуу, учурдагы маселелерди талкулоодо күчтүү укуктук база, өз ара аракеттенүү механизмдер иштеп чыгуу үчүн кеңири мүмкүнчүлүк болуп саналат.

«Кыргыз Республикасынын Өкмөтү Биримдиктин алкагында кызматташтыкты жана тыгыз байланыштарды бекемдөөнү алдыга жылдырат. 2017-жылы биздин өлкөнүн төрагалык кылуусунун мааниси чоң. ЕАЭБге төрагалыктын алкагында мындан ары уюмдун натыйжалуулугун жана кадыр баркын бекемдөө максатында бардык багыттар боюнча көп тармактуу кызматташтык жана өз ара түшүнүшүү иштери улантылат», – деп баса белгиледи Сооронбай Жээнбеков.

Премьер-министр Евразия өкмөттөр аралык кеңештин өтүп жаткан жыйыны евразиялык мейкиндикте эң негизги жана мындан аркы өз ара түшүнүшүүдөгү актуалдуу маселелер боюнча конструктивдүү пикир алышуунун дагы бир жакшы мүмкүнчүлүгү болоруна ишенимин билдирди.

Ал белгилегендей, Кыргызстан өкмөттөр аралык уюмдун кызыкчылыгын кеңейтүүгө бардык тараптан кызыкдар, биримдиктин алкагында анын түзүмдүк бөлүмдөрү менен мындан ары да жигердүү кызматташат, биримдикке мүчө мамлекеттер менен соода-экономикалык мамилелерди андан ары өнүктүрүүгө көмөктөшөт.

ЕЭК коллегиясынын төрагасы Тигран Саркисян 2017-жылдын 3-мартында Москва шаарында ЕАЭБ мүчө мамлекеттердин вице-премьер-министрлеринин деңгээлинде өткөн Евразиялык экономикалык комиссиясынын кезектеги жыйынынын жыйынтыгы тууралуу айтып берди.

Жолугушууда 14 маселени камтыган эртеңки жыйындын күн тартиби талкууланды. Эскерте кетсек, эртен, 2017-жылдын 7-мартында, Бишкек шаарында Кыргыз Республикасынын Евразия экономикалык биримдигине төрагалыгынын алкагында, ЕАЭБге мүчө мамлекеттердин Өкмөт башчыларынын катышуусунда, Евразия Өкмөттөр аралык кеңешинин кезектеги жыйыны өтөт. Евразия Өкмөттөр аралык кеңешинин жыйыны тар чөйрөдө жана кеңейтилген курамда болот.

Евразия Өкмөттөр аралык кеңешинин жыйынынын соңунда бир катар документтерге кол коюлуп, жалпыга маалымдоо каражттарына билдирүү жасалат.

Пикир

Оставить комментарий