Трамп Нью-Йорктогу теракттын аткаруучусун өлүм жазасына тартууга үндөдү

455 кароо Дүйнө 0

Бишкек, 02.11.17 /Кабар/. АКШнын прокурорлору өзбекстандык иммигрант, 29 жаштагы Сайфулло Саиповго Нью-Йорктогу сегиз кишинин өлүмү боюнча айып такты. Прокуратура анын аракеттери «Ислам мамлекети» экстремисттик тобу тарабынан демилгеленген деп эсептөөдө.

Прокурорлор 1-ноябрдагы сотто маалымдашкандай, колго түшүрүү маалында жаракат алган Саипов ооруканадагы өзү жаткан бөлмөгө ИМ тобунун желегин илип коюуну өтүнүп, кылган ишине ыраазы экенин билдирген.

Саиповду сотко колу бутун таңып алып келишти. Анын жүрүшүндө соттолуучу орус тилдүү котормочунун жардамы менен көрсөтмө берди. Ага тагылган айыптар боюнча өлүм жазасы каралган.

Ал ортодо ФБР бул иш боюнча дагы бир өзбек тектүү жаранды, 32 жаштагы Музаммадзоир Кадыровду суракка алып жатканы кабарланууда. Сот тарабынан дайындалган Саиповдун адвокаты Дэвид Патон соттолуучу алган жарааты катуу оорутуп жатканын жана абакта дарылануусун улантууну өтүнгөнүн айтты.

Сайфулло Саипов 31-октябрь күнү Нью-Йорктун Манхэттен аймагында велосипедчендер жүрчү жолго жүк ташуучу унаасы менен кирип, адамдарды тебелетип кеткен. Натыйжада сегиз киши өлүп, 11 адам түрдүү жаракат алган.

Прокурорлор Саипов өзүнүн мыйзамдуу укуктарынан баш тартып, ооруканадагы сурак маалында күнөөсүн моюнуна алып көрсөтмө бергенин билдиришти.

Прокурорлор Саиповдун уюлдук телефонунан табылган жүзгө жакын видео жана 3 800дөй сүрөттөрдүн көбү ИМ пропагандасына байланышы бар экенин билдиришүүдө. Саипов көбүрөөк адамды өлтүрүү үчүн атайын Хэллоуин майрамы белгиленчү күндү тандап алган.

Нью-Йорктогу теракттан кийин АКШ президенти Дональд Трамп саясий сылыктыктын ордуна «тез жана катаал» сот адилеттиги келиши керектигин билдирди. Андан тышкары Трамп Саипов АКШга кирүү үчүн пайдаланган Green Card lottery программасынын аракеттерин токтотууга чакырды.

Булагы: CENTRAL ASIAN

Пикир

Оставить комментарий