Улуттук илимдер академиясынын президенти шайланды

289 кароо Кадр саясаты 0

Бишкек, 31.10.17 /Кабар/. Бүгүн, Кыргыз Улуттук илимдер академиясында Жогорку башкаруу органы болуп саналган жалпы чогулушта УИАнын президенти шайланды. УИАнын Уставына ылайык УИАнын президентинин талапкерлиги Кыргыз Республикасынын Премьер-министри жана УИАнын жалпы чогулушу тарабынан сунушталат. Шайлоонун негизинде УИАнын академиги, техника илимдеринин доктору Мурат Садырбекович Жуматаев президент болуп шайланды. Бул тууралуу илимдер академиясынын басма сөз кызматы билдирди.

Жалпы чогулушту өткөрүүнүн регламентине ылайык, УИАнын академиктери күн тартиби боюнча өз ойлорун билдиришти. Анда окумуштуулар Кыргызстандын илими жана илимдер академиясынын илимий-уюштуруучулук ишмердиги жөнүндөгү актуалдуу маселелерди көтөрүп чыгышты. Илимий кадрларды академияда кармап калуу жана жаштарды илимге тартуу, айлык акыны көтөрүү, илимий-изилдөөлөрдү өткөрүү үчүн жабдуулар менен материалдык жана техникалык базаны тез арада жаңылоо көйгөйлөрү айтылып, илим тармагын көтөрүү мамлекеттин илимий кадрларды колдоосунан жана буга чейинки иштелмелерди өткөрүүдөн көз каранды экендигин билдиришти.

Физика жана техникалык, математикалык жана тоо-кен жана геологиялык илимдер бөлүмүнүн төрагасы, академик Алтай Бөрүбаев М. Жуматаевди колдоорун билдирип жатып: “Өлкөнүн жаңы бийлиги илимге эми көңүл бурат деген үмүттөмүн. Илимдин өнүгүүсү үчүн Өкмөттүн колдоосу абдан маанилүү. Мисалы, айрым бир өлкөлөрдө фундаменталдык изилдөөлөрдүн мааниси улуттук коопсуздук маселелерине барабар экен. Илимдер академиясы 15 жылдан бери бир да мамлекеттик буйрутма ала элек”, - деп кошумчалады.

УИАнын академиги, геология жана минералогия илимдеринин доктору Розалия Женчураева УИАда прикладдык изилдөөлөр жок деген пикир негизсиз экенин айтып: «Биз карта, бургулоочу орноткучтарды жана математикалык моделдерди түзөбүз, прикладдык иштелмелер колдо бар болсо дагы мамлекеттик буйрутмалар түшө элек. Сапаты биздикинен төмөн, даяр жабдууларды чет өлкөлөрдөн сатып алуу ыңгайлуу болгону менен Кыргызстанда эмес, башка өлкөлөрдө жумуш орундарды түзүлүп жатканы өкүндүрөт", - деди.

“Илимий жетишкендиктер өндүрүшкө жакшы киргизилбей, өз ордун таппай жатат. Алгылыктуу багыттарды аныктап, жаңы иштелмелерибиз колдоого алынса, биз жогорку деңгээлдеги жетишкендиктерге ээ болобуз деген ойдомун”, - деди УИАнын жаңы шайланган президенти М.Жуматаев.

Академик М.Жуматаевдин кандидатурасынын жактырылганына байланышкан документ 1 айдын ичинде КРнын Премьер-министри тарабынан бекитилиши керек.

Пикир

Оставить комментарий